மாயவிளக்கும் மந்திரக் கோல்களும்

மாயவிளக்கு
தவத்தின் வலிமையால் கிடைத்தது
சுரண்டியபோது
புதிய உலகம் சுடர்ந்தது

நெடுஞ்சாலை திறந்தது
கொட்டு கொட்டென்று
கொட்டிற்று ஜிம்கானா
சிறகு முளைத்தது
திசைகள் விரிந்தன
கடல் விமானங்களும் கரையை தொட்டன
ஹெலிகொப்டர்கள் பறந்தன கீழும் மேலும்.

தேவர் உலகிலும் ஆசனம் கிடைத்தது
திருமாலும் சிவனும் கைகுலுக்கினர்
சகுனி மாத்திரம் சறுக்கிக் கொண்டான்
வலிமையின் தவத்தால் வாய்த்த விளக்கை
உயர் கொம்பு சாத்தான்
உடைக்கப் பார்க்கிறான்.

மந்திரக்கோல் ஒன்றை
மேசையில் வைத்துள்ளோம்
மடியில் உள்ளன மற்றைக் கோல்கள்
இவையெலாம் கண்டு
ஆப்பிழுபட்ட குரங்கு
அலறித் துடிக்கிறது. 

- 2003

தீக்கனா

நான் வளர்த்த கிளி
பருந்தாகி பறந்தது காண்.

எனது அர்ஜுனன்
தேரைவிட்டிறங்கி
குரு ஷேத்திர
தெருவில் நடந்தான் காண்.

எனது அபிமன்யூவை
கௌரவர்கள்
தமது அணியில்
மாலைபோட்டு வரவேற்றுக் கொண்டார்கள்.

பாண்டவர்கள் தமக்குள்
பகைப்போர் முடிப்பதற்கு
ஆள் தேர் அணியுடன்
அலைந்தனர் காண் அஸ்தினாவில்

மலை முகட்டில் தந்தை
மகன் வருவான் என
தாடி வளர்த்து
தலை நரைத்து போனார் காண்.

நான் வரைந்த காவியத்தின்
நடுப்பக்கம் கரியாகி
போனது காண்....போனது காண்....
போனது காண்....போனது காண்....

தீக்கனா கண்டு
திடுக்கிட்டு
கண் விழித்த நள்ளிரவில்
என் ஆக்காண்டிப் பறவையிதோ
விண் முழுவதும் கதறி
வேகிறதே....வேகிறதே ....

- 2004