இந்திய அரங்கு

பாண்டிச்சேரி பல்கலைக்கழகத்தில், நாடகத்துறையில் தனது மேற்படிப்பினை மூன்றாண்டுகள் மேற்கொண்ட செ. சுந்தரேஸ் அண்மையில் யாழ்ப்பாணம் திரும்பியிருந்தார்.
'சமகால இந்திய அரங்குகளின் போக்கு - ஒரு அனுபவப் பகிர்வு' என்ற தலைப்பிலான உரையினை 22.09.2004 இல், யாழ். நாவலர் கலாசார மண்டபத்தில் அவர் நிகழ்த்தினார். அதில் அவர் கூறிய கருத்துக்கள் சில:
“இந்தியா முழுவதற்குமான அரங்கு என்று இல்லை. தமிழகத்திலேயே வடபகுதிக்கும் தென்பகுதிக்கும் வேறுபாடு உண்டு. பிரதேச அரங்கு நூற்றுக்கணக்கிலுண்டு, அங்குதான் இந்திய ஆன்மா உள்ளது.
தமிழ்நாட்டில் 'கூத்துப்பட்டறை' ஆரம்பத்தில் கூத்தை வளர்ப்பதை நோக்காகக் கொண்டிருந்தது, இன்று நவீன நாடகங்களை மட்டும் போடுகிறது. வேலு சரவணனின் 'ஆழி' சிறுவர் நாடகங்களை மட்டும் போடுகிறது. 'கூட்டுக்குரல்கள்' குழு தலித் பிரச்சினைகளை மட்டும் பேசுகிறது. மங்கை, பிரஸன்னா ராமசாமி, நளாயினி ஆகியோர் பெண்ணிய அரங்கில் செயற்படுகின்றனர்.”   

இலக்கிய நோபல் பரிசு

2004 ஆம் ஆண்டிற்கான இலக்கியத்துறை நோபல் பரிசு, "எல்பிரைட் ஜெலினெக்" என்னும் பெண் எழுத்தாளருக்கு வழங்கப்படுகிறது; இவர் ஒஸ்திரியாவைச் சேர்ந்தவர்.
காதலியாகப் பெண் (1975), அற்புதமான காலங்கள் (1980), பியானோ ஆசிரியர் (1983) முதலிய நாவல்களை இவர் எழுதியுள்ளார்.