பூபாலசிங்கம் புத்தகசாலையின் `ஈழத்துக் கவிதைகள்' நூல் வெளியீடு
 
[02 - January - 2007]
 
பூபாலசிங்கம் புத்தகசாலையின் வைரவிழா ஞாபகார்த்தமாகத் தமிழ் நாட்டில் பதிப்பிக்கப்பெற்றுள்ள "இருபதாம் நூற்றாண்டு ஈழத்துத் தமிழ்க் கவிதைகள்" எனும் நூலின் வெளியீட்டு விழா எதிர்வரும் 13 ஆம் திகதி சனிக்கிழமை மாலை நடைபெறவுள்ளது.
138 ஈழத்துக் கவிஞர்களுடைய தரமான கவிதைகளை உள்ளடக்கியுள்ள இத் தொகுப்பு நூலின் வெளியீடு கொழும்பு தமிழ்ச் சங்க மண்டபத்தில் பேராசிரியர் சி.தில்லைநாதன் தலைமையில் நடைபெறவுள்ளது. இத் தொகுப்பு நூலுக்கான கவிதைகள் அனைத்து ஊடகங்களின் வாயிலாகவும் கவிஞர்களிடமிருந்து கோரப்பட்டு, தேர்ந்தெடுக்கப்பட்டுள்ளன. அமரர்களாகியுள்ள ஈழத்தின் முன்னணிக் கவிஞர்களது பிரபலமான கவிதைகளும் இணைக்கப் பெற்றுள்ளன. சிறிஜெயவர்த்தனபுர விரிவுரையாளரும் கம்பன் கழக அமைப்பாளருமாகிய சிறி.பிரசாந்தனால் தொகுக்கப்பெற்றுள்ள இந்நூலில் 207 கவிதைகள் இடம் பெற்றுள்ளன. மேலும், இருபதாம் நூற்றாண்டுக் கவிதையியல் குறித்த ஆய்வும் பின்னிணைப்பாகத் தொகுக்கப் பெற்றுள்ளது.

13 ஆம் திகதி மாலை 5.30 மணிக்கு ரி.கருணாகரனின் கடவுள் வாழ்த்தோடு ஆரம்பமாகும் வெளியீட்டு விழாவை கொழும்பு தமிழ்ச் சங்கத் தலைவர் குமாரசாமி சோமசுந்தரம் தம்பதியர் மங்கள விளக்கேற்றி ஆரம்பித்து வைக்கவுள்ளனர். மல்லிகையாசிரியர் டொமினிக் ஜீவாவின் வாழ்த்துரையைத் தொடர்ந்து கவிதைத் தொகுப்பினை மூத்த கவிஞர் மு.பொன்னம்பலம் வெளியிட்டு வைக்க மஹாகவியின் மகளும் கவிஞருமான திருமதி ஔவை விக்னேஸ்வரன் முதற்பிரதியைப் பெற்றுக் கொள்ளவுள்ளார். கவிஞர்களான என்.ஆத்மா, சிதம்பரப்பிள்ளை சிவகுமார் ஆகியோர் நூல் விமர்சனவுரைகளை ஆற்றவுள்ளனர். நிறைவில் நூலின் தொகுப்பாசிரியர் ஷ்ரீ.பிரசாந்தன் பதிலுரை ஆற்றுவார்.

ஈழத்து இலக்கியத்துறையோடு நீண்ட காலமாகப் பெரிதும் தொடர்புபட்டு வந்துள்ள பூபாலசிங்கம் புத்தகசாலை தனது 60 ஆம் ஆண்டு நிறைவையொட்டி தமிழ் நாடு `கவிதா பதிப்பகத்தினூடு' வெளியிட்டிருக்கும் இந்த நூலை 2007 ஆம் ஆண்டு அமுதவிழாக்காணும் ஈழத்துப் பெருங்கவிஞர் மஹாகவி உருத்திரமூர்த்திக்குச் சமர்ப்பித்து மகிழ்ச்சியடைவதாக பூபாலசிங்கம் புத்தகசாலை அதிபர் பூ.சிறீதர்சிங் தெரிவித்துள்ளார். மேலும், அனைத்து இலக்கிய ஆர்வலர்களையும் வெளியீட்டு விழாவில் கலந்து சிறப்பிக்க வேண்டுமெனவும் அவர் வேண்டுகோள் விடுத்துள்ளார்.